قصه يتيمه (علاقه فاشله!)

لا شاغبني الليل

احسك هنا يمي

واذا داعبني القمر

شوقك سرى بدمي

وحسيتك من قلبي قريب

تسكني مثل مأوى لغريب

تعيش بانفاسي

وتسامر هدب عيني

ويمر الوقت بوسط زحمه

ما بين اهلي وناسي

واظل وحيده ومو وحيده

.

.

.

لا تجفيني لا تحترق روحي

لا تجيني لا ذبل قلبي

لا تناقضني مليون مره

وتبي تفهمني مره

لا تستسهل الصعب

وتطلب بسهوله اعطيك قلب

.

.

.

لا بعت انا ما ابيع

اشريك بالغالي

تحت امرك وقلبي لك مطيع

يفداك حالي ومالي

.

.

.

يتيمه لاني بقلبك؟

يتيمه لو ظلمني حبك

يتيمه لا انحرمت من قربك

يتيمه لو ضيعت دربك

.

.

.

يا قطعه مني

يا شي فيني

يا دم يجري بشراييني

عنك ابد ما استغني

وان كنت خسران

ما تخلى عن قطعه مني

قراري وماني ندمان

شي من قلبي

مجنونه بالحرم الجامعي في مهمه رسميه

من حكمي بالحياة ومن اهم المقولات المشهوره لي والي انا اكيده اني استنبطتها من واقع حياتي

ما يلي: يا انـــــــــــــــــــــــــــــا مينونه والناس عاقلين

يا انا عاقله والناس ميــــــــــــــــــــــانين اكو وحده تأخذ اجازه ويصير فيها الي يصير فيني !!!!!!!؟؟؟؟؟؟؟؟؟؟؟؟ ما اعتقد

يعني امس اقعد من فير الله (لو عندي دوام لو اموت ما اسويها) والله قعدت وخلصت جم شغله وطلعت عندي موعد(طبي والله موعد طبي) المهم خلال استعداداتي للطلعه والا التليفون يرنع منو؟؟؟؟؟؟ الفاره من الدوام داقه تصبح علي ...............انزين انا اجازه فرضا نايمه شكو تدقين من فير الله ولا الاخت تقولي الدوام ما يسوى من دونج مكانج خالي عاد انا هالسوالف ما اقاومها جان اقولها فديتج حتى انا مشتاقه لكم واصلا انا قاعده بس حبيت اطفرج( الله يسلمكم التطفير تخصص مساند لدراستي العلميه) والله انا سنعه المهم حركت ولا اختي الشيخه تدق

ميموووووووووووا لحقي

انا شصاااااااااااااااااااااااااار @@

الدكتور مو مداوم

انا حلفي!!!!!!!

شسوي محاضرتي الثانيه الساعه ثنتين(للعلم الاخت محاضرتها الاولى عالـساعه 9 صباحا)

انا شنو الحل تبين اييج؟؟؟؟؟؟

تيين تقعدين عندي وتتغدين وننطر المحاضره الثانيه( المحاضره الثانيه عالساعه 2 ظهرا)

انا حلفي بس ....قولي والله ....مو بنت الغسالة انا

اي والله ما اقدر ارد البيت

انا خلاص اخلص واييج

تخيلوا من الجابريه الساعه 11 لي كلية اختي 45 دقيقه بالطريج الله لو عايشين بمصر ،ولا انا رايحه على بعير جان متى وصلت اتوقع اليوم واصله عندها

المهم وصلت انا بجلالة قدري وبهاء طلتي واشتريت جم كتاب من معرضهم ورحت اتغدى بكافتيريتهم الله لا يواريكم قصدي الكافتيريا

يعني خلال ساعه حاشني مغص وصداع مو طبيعي

بس عندي سؤال والله من صجي

الكائنات الي كانت بالكافتيريا وفيهم كبت سوالف 5 ايام يصنفونهم من البشر يعني من فئة الحريم لانه والله الي شفته شي ما يتصدق والي سمعته شي من الخيال@@

يعني طالبات خريجات المستقبل امهات الاجيال القادمه يعني صج والله والله من صجي شنو تسمونهم قاعده اقول لاختي شنو هذا شنو هالقرقه راسي بينفجر

توقعون شنو ردت ::::: يا حليلج اصلا الكليه فاضيه والبنات مو مداومين هذا ولا شي سؤال ثاني اموت ويصير فيني شي بس اعرف جم حسنه طارت وجم سيئه كسبوا من هالقعده؟؟؟؟؟

الساعه 2 الظهر قررت ما انطر اختي وادخل معاها المحاضره(الشعر العربي في العصر الحديث) العجايب::

الدكتور قال جم معلومه وقعد يسولف 45 دقيقه الباقيه

الي قاعده على يمين اختي نامة وراسها حطته على الطاوله

الي وراي تسولف وفاتحه ديوانيه(خنت حيلي الشباب سوالفهم شويه بس للتشبيه)

الي يم الي وراي يوعانه وقاعده تاكل صوت القراطيس مسموع

والاكيد محد مداوم والبنات كل شوي وحده داشه تتمخطر ومالها خلق (المنه على الدكتور طبعـــــــــــــــــــــا)

الاشياء الحلوووه

الدكتور تكلم بمواضيع انا احبها يعني تكلم عن الشعر ما قبل النهضه وشوي عن ما بعد النهضه

تكلم الدكتور عن دور نازك الملائكه في تغيير الشعر العربي الحديث بس ما تكلم وايد بهالموضوع

الممتع اني كنت فاقده احساس الطالبه من زمان فظليت اناقش الدكتور يعني عشت الجو كأني طالبه

كتبت الملاحظات عن اختي وخططت المهم بالنوته

كنت انا واختي الوحيدين المصحصحين بالقاعه ومركزين

انا واااااااااااااااااااااااايد استانست بهالتجربه جد والله تمنيت اني ارجع طالبه من يديد

واخيرا اديت المهمه على اكمل وجه ووصلت اختي بنت ابوها للبيت سالمه غانمه من دون اي خدوش

شي مهم وبخاطري اقوله

اكثر انسان حسيت بقيمته وقيمة زيارتي لمدونته بهالمحاضره المدون الي انا زعلانه عليه والي صج فاقدته والي ودي اقوله ترى لك وحشه ومكانك صج خالي اخوي المبدع ابو اسحق

يعني صج احس لو اي احد يحضر هالمحاضره ويكون قرأ في مدونة ابو اسحق ماراح يحس انه في شي صعب لانه تكلم عن شخصيات مهمه غيرت مجرى الشعر العربي مثل نازك الملائكه وبدر السياب

اهداء

اهداء

الاغنيه على بالي وصارلي فتره بس ارددها

احسها معبره وبنفس الوقت على المود وتبون الصج واااااااااااااااااااااايد هاديه وبما اني من عشاق فيروز وخصوصا هالاغنيه اهديها للكل مو دون استثناء

:)

اتمنى تتغير الاوضاع للأحسن والله يحفظ الكويت وشعبها من الفتن ومن كل مكروه

اللهم آميـــــــــــــــــــــــــــــن

ليلي غير

انتهى الليل وانا ليلي طويل

بعد ما نامت عيون وانا نصيبي السهر

وابتدى فجري وهو توه صغير

يمشى بخطى معتريها الضجر

ايدي على قلبي على جرحي العليل

وقلبي على نفسي من الحزن انكسر

امشي دروبي بثقل من دون حيل

واقول يا رب لك الحمد لك الشكر

لي رضا بحالي وكبريائي كبير

مستحيل اهتز او حتى يموتني القهر

بس.....مرات يكون الصبر فيني بخيل

ومرات اعجز و اساير القدر

مو كل نفس اماره بالسوء؟

كيف اعد غلطاتي وكيف اعتذر

لو قسى وقتي و انا وقتي قليل

ما افقد الامل و الاكيد اني اصطبر

وارجع لذكرياتي وماضي ما منه بديل

لاجل اجمع شتات روحي وخاطر ما انجبر

وارد اقول تو الناس تو الوقت طويل

رغم ملامح الشيب رغم ملامح الكبر

ولو رسمها على وجهي قدري البخيل

اظل اكابر على عمري الصغير

وتبقى تجاربي مع زماني دليل

فلا هزتني ريح ولا قيدني الدهر

يا زماني دامك لهمي عديل

تاكد اني لاني بحر ولا لي يد بالغدر

بالنهايه ما اقول اني شخص مستحيل

لاني ابقى انسان ..........ابقى بشر

ها نحن عدنا ننشد الهولو

امممم

ما ادري شنو اقول بالضبط او شنو المفروض اتحجى عنه وليش القطاعه بس الاكيد والي يهمني تعرفونه انه لي اسبابي

بالاول كنت ابي ابعد عن الكل حتى عن اهلي ورفيجاتي وبين علي هالشي ولما قررت ارجع غلبتني ظروفي الصحيه وخذتني بعيد عنهم وعن الكل والحمدلله على كل حال

اما اليوم فهو غير .اليوم ابدأ اخذ دوا يديد يعني علاج لاول مره اخذه والدكتور متأمل خير خلال الشهور اليايه وغير جذي رحت البحر وشربت قهوتي وقعدت اتفرج على اليهال الصغار وهم يلعبون على النافوره ويتبللون بمايها الله يحفظهم رسموا على ويهي ضحكه لدرجه ما حسيت بالوقت يمر الا لما ابلاتهم قالوا لهم انه الرحله انتهت ((تذكرت خروفه حبيبتي))

اطفال ويهال وصغار يعني براءه يعني كائنات ما تعرف شي عن الدنيا وكل همهم انهم يلعبون ويضحكون حتى الاكل ما يتذكرونه غيروا احساسي بوايد اشياء من حولي ، اليوم وكالعاده رحت للعياده بس حسيت اني مخنوقه ومو قادره اتنفس وطلعت خلصت جم شغله بالداوم والاكيد اني ضيقت خلق ناس اعزهم بس والله من غير قصد ودقيت على الوالد اطلب منه نروح البحر وفعلا ما ردني مع الجو الحلو والهوا البارد واليهال احس ارتحت شوي وبطلب من ناس معزتهم غير وعارفين نفسهم قلت ارجع اكتب ارجع للناس الي اعرفهم الي يهموني والاكيد اهمهم مع امنيه صغيره

اتمنى تقدرون اني ما اقدر اكون موجوده على طول خصوصا الـ 3 شهور اليايه على الاقل لين اعرف راسي من كرياسي

خل اكلمكم واقولكم شوي عن الفتره الي طافت

اولا راس السنه كان يخرررررررررررررع لاني سويت حادث وهلقت فيني راعية البنز((اللهم لا اعتراض))

ثانيا انسانه غاليه على قلبي حيــــــــــــــــــــــــــــــــل دشت دنيا ((قللللللللللللللللللللللللللوووووووووووش))

ثالثا انا واعوذوا بالله من كلمة انا :) كملت 23 ربيعا ((خمسه وخميسه)) ووقف عمري هني ((للعلم بس))

رابعا ولاول مره في حياتي اشوف الفقر على اصوله واقعد بدون فلوس اسبوع كامل((الله لا يبلاكم))

خامسا في حلم اتمنى احققه وقاعد اسعى له ادعولي ترى دعاء المسلم لاخيه في وجه غيب مستجاب(( كسرت خاطر نفسي))

وبس كافي يعني مو معقوله بقولكم كل شي وافضح عمري ما يصير

اخيرا

ابي اشكر خروفه ونونه(نجمه للي ما يدري) وستكونه ولوير على سؤالهم عني واحب اقولهم لا خلا ولا عدم فديـــــــــــــــــتكم

والي بالي بالك :) مشكووووووووووووووووور على الاهتمام يا احلى اخو بالدنيا؛)

وشيخة البنات الحلوه صاحبة السمو السنيوره بنت ابوها حبيبة قلبي زيون ((انتي عارفه السبب))