02‏/07‏/2011

I am back again

writing

Since two years many things happened in my life that prevent me to write in blog

Some of them were good things but others I wish just to remember but not happen again

Miss you all crazy people , Miss writing and miss talk about something inside me that I feel it could make change or want to hear other people opinion about it

I miss many people her who I found their blogs empty and no sign of life there, people who I love,people who I respect,people who I have faith that they make change in others by there simple words and people who deserve to be more than friends but family

WISH U COME BACK ALL Sad smile

 

19‏/09‏/2009

في وداع شهر الخير :(

هالمره صج ما حسيت برمضان ولا بطعم الصلاة بالمسجد مع الناس الي يصلون للاسف كنت حدي مشغوله مع اخوي المريض وما بين دوامي واخوي ما لقيت وقت لصلاة القيام مع اني كنت اسمعهم وانا بالسياره خصوصا صوت المصلين لما يقولون اميــــــــــــــــــــــــن من بعد قراءة سورة الفاتحة فعلا كانت هالكلمة تنزل دموعي غصب لما احس بخشوعهم ولما يكون املهم بالله كبير يتقبل منهم
هذا اول عيد يمر بحياتي يكون اخوي مو معاي فيه فعلا تعودت على سفر وغياب باجي اخواني الا اهوو والي يحر اكثر انه راح يقضيه بالمستشفى يعني بين 4 طوف صج اني كنت اتناجر معاه واطفره بس الحين لو يعطوني كنوز الدنيا مقابل انه الدكتور يقول انه صار بخير ويقدر يترك المستشفى راح اختار الاختيار الثاني مالي غنى عنه ما عندي احد اطفر فيه وانرفزه غيره :(
كنت اتمنى اني اكتب هالبوست بوقت ابجر اهنيكم فيه برمضان وبنفس الوقت استغل طيبتكم واطلب منكم تدعون لاخوي ان الله يشفيه بس للاسف فعلا ما كان في وقت وانا مقصره مع الكل حتى مع اقرب الناس لي
هالمره ابي عيديتي وابيها من الكل :)
عيديتي انكم تقولون هالدعاء وعسى ربي يستجيب ويشفي اخوي ان شاء الله
اللهم اشفه شفاء ليس بعده سقما ابدا..اللهم خذ بيده اللهم احرسه بعينيك التى لا تنام . و اكفه بركنك الذى لا يرام و احفظه بعزك الذى لا يُضام .و اكلأه فى الليل و فى النهار .و ارحمه بقدرتك عليه ّ.أنت ثقته و رجائه يا كاشف الهم . يا مُفرج الكرب يا مُجيب دعوة المُضطرين .اللهم البسه ثوب الصحة والعافية عاجلا غير اجلا ياأرحم الراحمين..اللهم اشفه اللهم اشفه اللهم اشفه..اللهم امين
عيدكم مبارك وعساكم من عواده

07‏/08‏/2009

فضفضة يعني قرقه

اممممم شنو اقولكم عندي سوالف وايد اولا . . الثلاث شهور الي فاتوا ما حسيت بالوقت او بالاصح ما حسيت بنفسي كنت حدي مشغوله بشنوو؟؟ انا اقولكم سويت نيو لوك للبيت وطبعا بما اني بسوي شي معناته هالشي بياخذ عقلي وتفكيري ووقتي ولازم يطلع على ذوقي ومزاجي شفيكم يعني سنعه ؛) ثانيا . . ادري بتقولون مينونه بس عادي مو شي يديد ابشركم انا قدمت على الجامعه وبدرس تخصص يديد غير تخصصي الي اشتغل فيه وفعلا قدمت اوراقي والحمدلله قبلوني يعني راح اصير اشتغل وادرس :))) ولا تقولون تعب ان شاء الله ما فيها تعب وانا حدي ابي هالشي بخاطري اغير روتين حياتي شوي وابي اسوي شي مفيد وله قيمة بالنسبة لي ثالثا . . وهذا اهم شي مو للكل بس للناس الي يهموني واحب اخذ واعطي معاهم هني والي ما اشوفهم منافقين او يحبون يلبسون اكثر من قناع الله يسلمكم انا طول الفتره الي فاتت كنت مو عارفه انا شنو ابي او شنو الغايه من وجودي لاني فعلا حسيت كل شي حولي ماله قيمه او بالاصح فقدت الاحساس بكل شي وصرت اشوف كل شي مهمش وماله دور مهم من جذي احتجت وقت عشان اعرف وافهم الي قاعد يصير وللعلم للحين هالاحساس موجود
خلاص كافي قرقه عفوا قصدي فضفضه :)

27‏/02‏/2009

هدوء يعم المكان وصوت موسيقى يصدح من بعيد وإلي بعيد .... أسافر إلي بعيد
لا أعرف أين ذلك المكان أو لعلني ؟!!!...........لازلت أبحث عن ذلك المأوى
هل نسيت نفسي هناك أم أضعتها ؟؟؟؟؟ على قارعة أحدى الطرق فقدتها؟
لم أعد أميل إلى الكتابه
أم هي اناملي التي لم تكتبني
أم عجزت الحروف عن الإعتراف
أو هي أنا التي لا تعرفني
كلماتي ضائعه
وقلمي جاف
وصفحاتي يملؤها الفراغ
فلم تعد الكتابة تصفني
خربشات وملاحظات بسيطة
وجمل غير مرتبة
وكلمات مبعثره بين السطور
تسعى لتعبر عما يشغلني
أعشق الوحده
فأنا مغرمة بالهدوء
ولا أتلذذ إلا بصمتي الذي يسكنني
فلا صوت الكلام يغريني
ولا أحاديث الغير تجذبني
لا مكان للضوضاء معي
ولا وجود للكلام او الحديث
صمت......
صمت......
صمت......
ذلك الذي أراه
وذلك ما يتخلل مسامعي
فأن كنت قريب او بعيد
وأن كنت معي او لست معي
فأنا أخترت صمتي
فهو الذي يملؤني
فلا أكتبه بل يكتبني