هذا عيدي ما يتغير اتوقع اني تأقلمت مع الوضع :)
امس سهرت للفير بعد ما جهزت حلويات العيد (قررت هالعيد اغير بدل لا اشتريهم من بره اسويهم بيدي احسن)و فعلا سهرت اسويهم عقب تذكرت اني ما عايدت الكل هني زرت كم مدونه وعايدتهم وصليت الفجر ونمت
الساعه 9 وشي صحيت على صوت المسجات الي استلمها تبون الصج كان فيني النوم بس اليوم اول يوم بالعيد يعني لازم ابلش شغلي مشكلتي اني احب اسوي شغلي بيدي قعدت وانا حاسه اني متاخره عطيت تعليماتي للخدامه وبلشت اجهز الشاي والقهوه والصحون وعقب بخرت البيت وجهزت نفسي عقب صحيت الاهل
صارت الساعه 11ونص ومحد بالبيت بقلبي قلت ماراح اكلم احد متى ما ييون على راحتهم دقيت على رفيجاتي وعايدتهم وصارت الساعه 1 بعد الظهر هني عصبت الصراحه من حقي وينهم انا من الصبح ناطره ادق على اخوي ما يرد اختي مطنشه ولا هامها امي تطالعني وساكته وانا ناطره عقب اصدرت حكمي وقررت اني استقبلهم بملابس البيت بلا عيد بلا كشخه :( بس خليت المكياج وشوي الا يايين و بين علي زعلانه من ويهي الفضيحه قرب اخوي وسلم علي ( اخوي الكرش العود اقرب واحد من خواني لي وفاهمني) باسني على خدي وقال وهو يهمس باذني ليش ما لبستي وين كشختج رديت بعصبيه عليه بكيفي.... ادري حركه مو حلوه بس والله من الصبح ناطره وانا عيدي فيه هو وعياله ومرته
شوي جان يطالع الحلويات وتحضيرات العيدالي انا مسويتهم جان يقول ما اقاوم شنو هالحركات (تدرون اكثر انسان احب اسمع المدح منه عقب الوالد ما ادري ليش) وشوي بلش العيد وحركات اليهال شلون يوروني كشختهم واخوي يعلق وراهم على اسامي المحلات ومن وين اشتراهم بس ترى كله تمثيل يعني مسوين عرض ازياء بالبيت:) وشوي بلش عبود يقلد نمر بن عدوان واندمجوا الاهل بالقعده ومر الوقت سريع واكيد وزعنا العيادي وانا بكل فخراقولكم صارلي سنتين اعطي عيادي بصراحه احساس يكبر بالعمر:)عقب تغدينا وهني انتهى عيدي
متصورين انه كل هالخبه والعفسه وسهرانه وقاعده من الصبح اجهز عشان 3 ساعات تمر بلمح البصر بمناسبة العيد مع انه العيد مدته 3 ايام
من ذكرياتي بالعيد انسان الله يرحمه كان من اعز ربع الوالد اسمه ابو عبدالله
عمي ابو عبدالله عقب ما رجعت اعيش مع ابوي تعرف علي وتبون الصج اغلب ربع ابوي يحبوني من وانا صغيره مع انه ابوي عنده عيال غيري.. اذكر مره قعدت من الصبح وكان عمري صغير يعني كنت بالابتدائي وعلى ما كنت اتجهز صارت الساعه 8ونص فجأه الوالد داش البيت ويمسكني من ايدي وامي تقوله ترى ما خلصت لبس وين ماخذها وهومطنش وانا ساكته مشيت معاه لين باب البيت (بيني وبينكم كنت خايفه شوي)ولا اشوف ريال طويل واقف عند الباب تدرون منو؟؟؟ عمي ابو عبدالله والابتسامه على ويهه معطيته طله ملائكيه طالعته مستحيه منه قرب مني ونزل لين صار بطولي وقال لي:انا نطرتج بس انتي تاخرتي هذي عيديتج. الي فهمته انهم حاولوا يخلونه يترك عيديتي ويمشي بس هو اصر انه يعطيني اياها بيدي احساس غريب يختلجني لما اذكر هالموقف الله يرحمه دايما كان حنون معاي ويهه بشوش
الله على ايام قبل ومع الشياب وقعدتهم الصبح من فير الله وعياديهم وسوالفهم وريوقهم العجيب خبز عربي وشاي وبابا غنوج وطماط مشوي وفول وبيض مسلوق وسمن حقهم وقوطي جبن قلاص وحليب ابوقوس حقي انا :).....اشياء افقدها ولا تستغربون صج ابوي مو معاي من صغري بس عقب لما ييت عنده وبوجود امي كان هو اقرب واحد لي وبكل شي حتى اهم خصوصياتي وبما اني قريبه منه معناته قريبه من كل ربعه الشياب واغلب الوقت كنت مصدر حواراتهم وليومكم هذا لازلت مصدر الحش مالهم
تدرون انهم حتى اذا انخطبت من بد كل البنات يتدخلون ويعطون رايهم:) قبل الكل
لازلت افقد البساطه وافقد ناس وايد الله يرحمهم وافقد عيد قبل لانه عيدنا حيل تغير افقد ايام العناقيص والشباصات والذهب ونفانيفنا المنفوشه
من امس كان بخاطري افضفض وبما انه عيدي انتهى بنفس يومه فاليوم قررت اني اكتب لكم شي من الي في بالي وبالأخير اتمنى من كل قلبي انكم تكونون قضيتوا عيد احلى من عيدي بواااااااااااااااااااااايد
.jpg)
