١٣‏/٠٧‏/٢٠٠٧

تاق من اخوي مناف

الاخ انيق ذو بريق لا يقاوم في عينيه ما حب يمر بهالشي بروحه وبما انه اخوي وانا ما ارضى على زعله ولا اقدر عليهكان لازم ارد
الله يحفظه ان شاء الله ويعز قدره ويخليه رايه من رايات الوطن اللهم آميـــــــــــــــــن
ماهو مشروبك المفضل؟
عصير الليمون من دون منافس يحتل الطليعه
ماهو طبقك المفضل؟
مافي شي معين اهم شي يكون خفيف وما فيه بهار وايد
كم ساعه تشاهد التلفاز؟
قبل ممكن الحين ما عندي وقت الا نادرا بسبب الدوام والنادي
ماهي اجمل هدية حصلت عليها في حياتك؟ وممن كانت الهدية؟
ساعة من اعز رفيجاتي عندي حب رهيب للساعات ومو شرط القيمه المهم تعجبني
اتحب ان تهدي اصدقائك هدية من اختيارك ام تعطيهم المال ليختاروا هديتهم؟
مو دايما يعني يعتمد اذا كانت قريبه حيل مني اكيد بفنتك بالهديه اما اذا مجامله اختار شي راقي وبسيط
أتكذب؟
هذا بلا ابوك يا عقاب ويهي فضيحه بس اجذب جكوا الحركة وخصوصا الوالد عشان جذي بس احس اني بجذب اقولهم اعفي نفسي من الاجابه او اني مالي شغل او ما اعرف
اترتدي الزي الرسمي لبلدك باستمرار؟
أي رسمي ان شاء الله البخنق؟! لا يبا اهي اللفه والعباة واللهم الستر
تدخن؟
مو دايما لا اتغشمر :) اساسا عندي مشاكل مع المدخنين واحاول كثر ما اقدر اقرب صوبهم
تتابع كرة القدم واحداثها؟
اكرهها واساسا علاقتي فيها شبه معدومه
جسمك طبيعي من الناحية الرياضية ام تعاني من الضعف او السمنة؟
اهني اعترف انه عندي لياقه الا اني لازم انزل من وزني بعد ولا ترى الدكتوره بتظل مجابلتني مدى الحياة صج انها مثل العسل على قلبي
بس هم ترى فرقاها عيد وانا اسفه وبيني وبينكم احب البنت متبتبه شوي مو منيكان
تحب شرب الماء الساخن؟
ليش مو كافي الحر الي بره بالجو بعد من داخل
اتحب اكل المثلجات ذائبة؟
احبها نص نص يعني لا ذايبه ولا مثلجه حيل
اتأكل الوجبات السريعة؟
بس من ماك ومو دايما الا انه غرامي للبيتزا اكثر
متى اخر مرة زرت فيها شاطئ البحر؟
شخباري أي منذ مبطي (كان المفروض اروح امس بس قدر الله وما شاء فعل
كم دولة غير دولتك زرت في حياتك؟
للاسف دوله وحده والله يسامح الظروف
من هو اعز اصدقائك؟
الورديه والامل واتوته و الفجر البعيد و نوفه
ماهو دينك؟
اشرايكم يعني ؟؟؟
ماهو احتمال تركك لدينك في يوم من الأيام؟
الله لا يقوله لعب اهو
هل تقرأ القرآن الكريم؟
اكيد كل جمعه واذا حسيت انه ضايق خلقي ومخنوقه
اتتابع برامج دينية؟
احيانا
كم ساعة تستخدم الأنترنت في اليوم؟
مو باليوم
اذا ما كان عندي خفاره او شغل او نادي اقعد وما يعتمد على الساعه يعني اخذ راحتي اذا ما وراي شغل
اتفتح بريدك الألكتروني اولا ام تزور مواقعك المفضلة اولا؟
المواقع بعدين اذا في وقت الايميل
اتعمل؟
طبعا مع شي الله يكفي الناس شره
أتحب او احببت المدرسة؟
كنت انطوائيه حيل عشان جذي المدرسه بالنسبه لي تاديت واجب وطاعه ومجهود لازم ابذله
أأحبك المدرسين؟
مو كلهم الا اني كسبت احترام اغلبهم لشخصي وطريقة تفكيري
هل انت او كنت من الطلاب المزعجين ام الهادئين في الفصل او القاعة؟
حيل هاديه وعلى فكره احب الهدوء في كل شي الا اني الحين صرت اضيف الشطانه عشان اغير الجو شوي
تعتبر من الطلاب المتفوقين؟
لا لانه الوالد يشوف انه الي ما يتفوق انسان غبي فكان لازم اثبت له العكس واغير نظرته لي والحين هو يعترف بهالشي الحمدلله
اعدت سنة دراسية في حياتك؟
لا الحمدلله تقدير الجيد جدا لازق بظهري ابد ما يفج
اتربي حيوان في بيتك؟
لا ان شاء الله بروحي خوافه
اتزرع اي نوع من النباتات في بيتك؟ وماهو؟
شوفوا الوالد حاط مزرعه شكبرها وذبحنا فيها كله كوم ومزرعته والماي كوم ثاني يعني لو ادعم او اطيح وهو يسقي المزرعه بيقول اخلص سقايه وبعدين اييج يكفي ذاك اليوم دست على الهوز مال الماي بالسياره فضحني وخله الي ما يشتري يتفرج علي :(
عندنا كل شي من الخضروات وخصوصا ادوات الخيسه وعندنا رقي بعد:)
اتخاف من المرتفعات؟
مو خوافه وبس الا فيها بجي ودموع وعزى بعيد عنكم
اتخاف من الحشرات؟
للاسف مو بس خوف وحساسية بعد يعني لو تقرصني بقه راح تشوفون الرعب المضاعف بالديره
اتخاف من الظلمة؟
بالعكس احبها بشكل مو طبيعي حتى الوالده تقول اني لما كنت صغيره كانوا كله يلاقوني قاعده بالظلمه احس انها مرتبطه بالهدوء وانا مرتبطه بالاثنين
اتخاف من رجال الشرطة؟ مو خوف احتقار لفئة معينه منهم ((الي تقول عادي انك تكون حاميها حراميها )) وفهمكم كفايه
ماهي هوايتك؟
الشعر والقراءه اقرب شي لقلبي
ماهي الشخصية الكارتونية المفضلة لديك؟
جودي ابوت وشخصيات انا واخي واكيد تويتي
مامستوى غرابة وغموض هذه الأسئلة؟
غريبه شوي بس ما فيها غموض
ماتقييمك للأسئلة؟
نو كمنت
لمن تحب ان تمرر هذه الأسئلة؟
الشايب براك
زوزتي
الجريح
روح
expatriate
ملاحظه الي اخترتهم لهم حرية الرد او الامتناع وشكرا

هناك ٢٣ تعليقًا:

أبو إسحق يقول...

عصير الليمون حلو و يهدي الاعصاب :)

طلعتي مو راعية فلفل :) - لكن اجابتج عن الشغل خلتني احس انج مو مرتاجه مع الوظيفه ... و اذا هالكلام صح مافي مجال تتركين الشغل و تروحين مكان ثاني ؟

المهم استمتعت بالقراءه عن شخصيه جميله و صريحه مثلج ... و اتمنى لج التوفيق في حياتج

شكرا

أبو إسحق يقول...

على فكره لا تضعفين وايد ترى المتبتبه و المتروسه احلى :)

MANAF يقول...

magnoona

:)

thanxx dear

الحين صار فيني ابي اعرف الوالد شقال لج لما دستي على الهوووز

:)

Unknown يقول...

لا تضعفين وايد ويقصون عليج ويقولون لج موضة :)))

الليمون بالصيف احبه بس بالشتا افضل اى شى ثانى

Mohammad Al-Yousifi يقول...

خوش تاغ

كأن مناف كنسل بلوجه؟

7osen يقول...

مرحباااا

اجوبه حلوووه

ضحكتيني على سالفه الماي الحار

ايي والله احنا ناقصينا كافي الحر اللى برا


تصدقيني كنت متوقع انج واااايد ضعيفه

:)))

اتمنالج كل التوفيق
ودمتي بكل الخير ايتها المجنونه الصغيره

Shather يقول...

هيهيهي يحليلج


لطفتي جوي الممل

النادي و الرجيم هذي عقده الجميع

انا بقص عليج و بقولج ضعفي لاني من البنات اللي يعانون هوس الرشاقه و متعبني هالشي نفسيا :(

magnoonah يقول...

إبو اسحق

ايه والله مو راعية فلفل ولا اجار ولا دقوس ابو الديك
:)

وبالعكس دوامي انا حيل مرتاحه فيه وهذا تخصصي الا انه فعلا الله لا يبلي الناس ابلي انا اشتغل فيه


بالنسبه لنصيحتك مشكور

انا الي استمتعت بتعليقك

شكرا لك

:))

magnoonah يقول...

مناف

بخليها بقلبك وما راح اقولك


واتمنى اذا تقرى ردي ترجع بلوقك ترى والله زعلتني منك


الحركه هذي مو حلوه

:(
لوسمحت
:(

magnoonah يقول...

Mishari

خلاص راح اسمع كلامك
:))

لاني مالي غنى عن خبرتك

بالشتا افضل دايما الموكا لاتيه او الفانيلا لاتيه خصوصا اذا الجو فيه رشات مطر

تحياتي

magnoonah يقول...

مطقوق

حياك الله
واسعدني انه التاق عاجبك


بالنسبه لمناف ما توقعته بصراحه انصدمت

امس كان موجود البلوق؟؟؟؟

magnoonah يقول...

حسون

مرااحب

لا تحرني

لا ابوي انت مو وااايد ضعيفه

هالشي اتحلم فيه

بس مع هذا عاجبني شكلي

ولابد من التغيير احيانا


وانا بعد اتمنى لك التوفيق

:)

magnoonah يقول...

Shather

حياج الله

ما تخيلين فعلا اسعدني مرورج ونورتي المدونه


والي اسعدني اكثر انه اجوبتي زاحت ولو شوي من جو الملل


انا معاج اقص على نفسي بس مو دايما لانه عندي حب ابتكار الاسلوب الخاص فيني حتى باللبس عشان جذي اغلب الوقت اطنش عشان اخفف من هالعقده

تحياتي لج

ودمتي سعيده بعيده عن الملل والهوس النفسي
:))

فراوله يقول...

مساالورد والجوري
للغاليين اللي مانقدر مانسير عليهم
ومانشوف شنو اخر اخبارهم
غاليتي الصغيرونة
يلوموني ويقولولي ليش تحبينها؟؟
مايدرون ان الانسان احاسيس مشتركة يمكن مانشوفه بس المهم ان نحس فيه..وهذاالاهم
فيج وايد اشياء مني
طبعا الخوف..وكرهج للحشرات والحيوانات عزج الله
روحج خفيفه وقريبه من القلب
وكل شي فيج ينحب
دمت بحب وود
غاليتي الصغيرونة
:)

barrak يقول...

بجاوب هني وهذي ثاني مره اجاوب على نفس الاسئله
على الرحب والسعه
ماهو مشروبك المفضل؟
بيبسي وثلج وقطعة ليمونه
ماهو طبقك المفضل؟
نقرور مشوي
كم ساعه تشاهد التلفاز؟
من الساعه 4 عصرا الى 4.25 عصرا
ماهي اجمل هدية حصلت عليها في حياتك؟ وممن كانت الهدية؟
عيالي
ام تعطيهم المال ليختاروا هديتهم؟
انا اختار واقعد ساعات اتكتك واخطط
أتكذب؟
على حسب الشخص والموقف
اترتدي الزي الرسمي لبلدك باستمرار؟
حق الدوام بس والمناسبات
تدخن؟
بشراهه
تتابع كرة القدم واحداثها؟
الاوربيه فقط
تعاني من الضعف او السمنة؟
الحمد لله سمبتيك
تحب شرب الماء الساخن؟
لا
اتحب اكل المثلجات ذائبة؟
تقريبا
اتأكل الوجبات السريعة؟
اذا رحت الدوانيه
متى اخر مرة زرت فيها شاطئ البحر؟
اسبوعين تقريبا
كم دولة غير دولتك زرت في حياتك؟
اعتقد فوق ال17
من هو اعز اصدقائك؟
القلم
ماهو دينك؟
سيكي
ماهو احتمال تركك لدينك في يوم من الأيام؟
اذ ينيت
هل تقرأ القرآن الكريم؟
اذا كنت فرحان وايد او متضايق وايد
اتتابع برامج دينية؟
الله يرحمه الشعراوي
كم ساعة تستخدم الأنترنت في اليوم؟
نصف ساعه
اتفتح بريدك الألكتروني اولا ام تزور مواقعك المفضلة اولا؟
المواقع المفضله
اتعمل؟

أتحب او احببت المدرسة؟
لا والله كنت كله ادعي على وزير التربيه
أأحبك المدرسين؟
ناس وناس
هل انت او كنت من الطلاب المزعجين ام الهادئين في الفصل او القاعة؟
كله يقولون عني باجتماع اولياء الامور كثير الحركه وكل شغله من تحت لي تحت
تعتبر من الطلاب المتفوقين؟
الين رابعه ثانوي
اعدت سنة دراسية في حياتك؟
لا بس قعدت بالجامعه 5 سنين
اتربي حيوان في بيتك؟
لا
اتزرع اي نوع من النباتات في بيتك؟ وماهو؟
ازرع واسقي الزرع بس مااعرف شنو نوع النباتات
اتخاف من الحشرات؟
بس الدبور
اتخاف من الظلمة؟
على حسب
يعني الظلمه بالبيت تونس
لكن شارع مثلا بجليب الشيوخ وظلمه ابجي
ماهي هوايتك؟
ماادري بس كنت احب اجمع علب الكبريت
ماهي الشخصية الكارتونية المفضلة لديك؟
فلونه بعد عمري
مامستوى غرابة وغموض هذه الأسئلة؟
لاتعليق
ماتقييمك للأسئلة؟
نو كمنت

عثماني يقول...

مساج الله بالخير اخيتي

جميل ان تعرفنا على حياتج عن قرب

دمت سالمة

om-bukhnag-zare :) يقول...

مساء الخير ابنيتي :)ا

اولا يزاج الله خير يالغالية إنج تعنيتي وسألتي عني والله العالم شكثر سؤالج انتي وباجي الخوات خفف علي التعب لا خلا ولا عدم
ثانيا : اشدعوه ياحافظ ياعقايل الله اشفيه البخنق :( ترا من فات اديمه تاه من فوق :)ا
والله يعافي اخونا مناف اللي خلانا انتعرف على جانب من شخصيتج
وخليج مثابره على النادي ماكو احسن من الرياضة واكيد انتي ابخص مو الا اتصيرين امعصصه لأن كلش مو حلو بس على الأقل حافظي على الوزن الصحي

حافظج الله يالغاليه

magnoonah يقول...

فراوله

مساء الانوار

يقولون القلوب شواهد

وهذا بعض مما عندنا

وانا الي ما اقدر على بعدج بعد

انت فعلا كتلة احساس الا انج مثل الغيمه تمطرين احاسيس مليانه حب وحنان وطيبه على الكل
:)
دمت بحب يالغلا

magnoonah يقول...

الشايب براك

اسفه وحقك علي

بس عندي كم استفسار
لو سمحت يعني؟؟

في سيكي يقرأ قرآن؟
كنت تدخن وانت ترد على الاسئله؟
شنو وداك الجليب بالظلمه؟
شنو نهاية جمع الكبريت ؟


بثقل عليك ادري

الله يعينك ياالسمبتيك
:)

magnoonah يقول...

عثماني

مساك الله بالخير والسرور

الاجمل مرورك على المدونه وقراءة الفضائح المنشوره عندنا
:)

فعلا اسعدني تواجدك


دمت سالما

magnoonah يقول...

ام بخنق زري


اولا
بما اني عرفت انج تعبتي واجب علي اسال عنج ولا خلا ولا عدم من طيبتج

وانت فعلا تستاهلين الخير كله

ثانيا
حرام عليج مو القصد والله بس انت متخيله اني اداوم الصبح ورايح الشغل لابسه بخنق؟

جان علوم والله


اما معصصه
ضحكتيني والله من وين يبتيها؟
لا تحاتيني لو اقعد العمر انزل بوزني بظل مفتخه شوي

:)))

اشكر مرورج على المدونه وفعلا فرحت بطلتج علي

مشكووووووووره

barrak يقول...

في سيكي يقرأ قرآن؟
اذا كان مطلع على الديانات الاخرى ممكن
بس انا كنت أعيّب على السؤال
كنت تدخن وانت ترد على الاسئله؟
لا
شنو وداك الجليب بالظلمه؟
لا بس كنت ابي اوضح اجابتي ان الجو العام اهو اللي يخليني اخاف او مااخاف من الظلمه
شنو نهاية جمع الكبريت ؟
بصراحه مابقى منهم الا ثلاث علب
خشيم الفار واخوه العنونو نثروهم وقطوهم
يعني اصبحت بلا هوايه

magnoonah يقول...

الشيبه المتشبب براك

ادري انك كنت تعيب بس حبيت اطفرك

ومشكور لانك ما كنت قاعد تدخن وعسى دوم
ادري انك حبيت توضح وانا اساسا فاهم اجابتك من دون لا تقول
الله ما كثر الكبريت واذا تبي نجمع الي في بيتنا وبالفريج ونعطيك اياهم ونرجع لك اهم هواياتك

تحياتي
:)