فضفضة يعني قرقه

اممممم شنو اقولكم عندي سوالف وايد اولا . . الثلاث شهور الي فاتوا ما حسيت بالوقت او بالاصح ما حسيت بنفسي كنت حدي مشغوله بشنوو؟؟ انا اقولكم سويت نيو لوك للبيت وطبعا بما اني بسوي شي معناته هالشي بياخذ عقلي وتفكيري ووقتي ولازم يطلع على ذوقي ومزاجي شفيكم يعني سنعه ؛) ثانيا . . ادري بتقولون مينونه بس عادي مو شي يديد ابشركم انا قدمت على الجامعه وبدرس تخصص يديد غير تخصصي الي اشتغل فيه وفعلا قدمت اوراقي والحمدلله قبلوني يعني راح اصير اشتغل وادرس :))) ولا تقولون تعب ان شاء الله ما فيها تعب وانا حدي ابي هالشي بخاطري اغير روتين حياتي شوي وابي اسوي شي مفيد وله قيمة بالنسبة لي ثالثا . . وهذا اهم شي مو للكل بس للناس الي يهموني واحب اخذ واعطي معاهم هني والي ما اشوفهم منافقين او يحبون يلبسون اكثر من قناع الله يسلمكم انا طول الفتره الي فاتت كنت مو عارفه انا شنو ابي او شنو الغايه من وجودي لاني فعلا حسيت كل شي حولي ماله قيمه او بالاصح فقدت الاحساس بكل شي وصرت اشوف كل شي مهمش وماله دور مهم من جذي احتجت وقت عشان اعرف وافهم الي قاعد يصير وللعلم للحين هالاحساس موجود

خلاص كافي قرقه عفوا قصدي فضفضه :)

هدوء يعم المكان وصوت موسيقى يصدح من بعيد وإلي بعيد .... أسافر إلي بعيد

لا أعرف أين ذلك المكان أو لعلني ؟!!!...........لازلت أبحث عن ذلك المأوى

هل نسيت نفسي هناك أم أضعتها ؟؟؟؟؟ على قارعة أحدى الطرق فقدتها؟

لم أعد أميل إلى الكتابه

أم هي اناملي التي لم تكتبني

أم عجزت الحروف عن الإعتراف

أو هي أنا التي لا تعرفني

كلماتي ضائعه

وقلمي جاف

وصفحاتي يملؤها الفراغ

فلم تعد الكتابة تصفني

خربشات وملاحظات بسيطة

وجمل غير مرتبة

وكلمات مبعثره بين السطور

تسعى لتعبر عما يشغلني

أعشق الوحده

فأنا مغرمة بالهدوء

ولا أتلذذ إلا بصمتي الذي يسكنني

فلا صوت الكلام يغريني

ولا أحاديث الغير تجذبني

لا مكان للضوضاء معي

ولا وجود للكلام او الحديث

صمت......

صمت......

صمت......

ذلك الذي أراه

وذلك ما يتخلل مسامعي

فأن كنت قريب او بعيد

وأن كنت معي او لست معي

فأنا أخترت صمتي

فهو الذي يملؤني

فلا أكتبه بل يكتبني

24 ربيعا :)

اليوم ومثل الـــــ 23 عام الي طافوا اكمل سنة من عمري وبجذي اليوم اصير انا 24 سنة ولذلك تبين لدي ما يلي:

• 24سنة بكامل طقم اسناني

• 24 سنة بعدد لا متناهي من الشعر المتساقط ( ليش ما ادري)

• 24 سنة وانا للحين اتحلم اشتري الرنج

• 24وانا للحين ما رحت اسبانيا

• 24 سنة وللحين اخوي يهنيني بعيد ميلادي بيوم قبله او يوم بعده بس مو نفس اليوم

• 24 سنة وللحين احس اني ما انجزت شي بحياتي ولا حسيت انه لي دور فعال مع اني مرات احس انه مكاني موجود ومبين بين الناس الس احبهم

اليوم احسه يوم عادي مافيه تغيير ولا فيه شي جديد عشان جذي عادي يعني عادي :)) ملاحظه: مشكور لوجودك بحياتي مشكور على الكلام الحلوو مشكور واااااااااااااااااااااااااااااااااااااااااااااااااااايد لاهتمامك صدقني لو اخوي من امي وابوي ما اهتم كثرك عشان جذي اذا عيد ميلادي هالمره راح يكون مميز فلأنك هنيتني فيه ولانه الكل ناسي وانت الي متذكرهالتاريخ.

2009

كل عام والكل بخير وان شاء الله تكون سنة سعيده على الجميع

:)

رمضان

كل عام وانتم بخير وعساكم من عواد هالشهر الفضيل

اتمنى ما يمر علينا كأي شهر عادي ونستغله بطاعة الرحمن وطلب المغفره

والله يتقبل من الجميع صيامه وقيامه

من اهم النصايح الي الاخت مجنونه تحرص وتنصح اخوانها واخواتها المدونين على اتباعها:

• لا تكثرون على الفطور مافي شي اسمه من كل بستان ورده (اعتقد احنا مو بمجاعه)
• ابتسموووا عشان حتى لو في احد معصب يرد الابتسامه بمثلها ويهدي من اعصابه
• كثر ما نقدر نحاول نقلل من كثرة النوم هذا مو شهر نوم واكل هذا شهر عبادة وترى ما يزورنا الا بالسنه مره ليش ما نستغله
• كثروا من قراءة القرآن وحاولوا تختمونه اكثر من مره ولا ننسى بعد نكثر من الدعاء لنا ولاخوانا المسلمين والاكيد ما ننسى الصدقه

وفي اشياء وايد اكيد الكل ناوي عليها وان شاء الله الله يوفق الجميع

طبعا انا كنت ناويه اسوي جم شغله بس ليش اني ما عندي نظام او مو منظمه بوقتي في الفتره الاخيره فقررت احط جدول ارتب فيه كل شي مثل عبادتي ،شغلي، هواياتي، راحتي، والاكيد خليت فيه وقت للواجبات المفروضه علينا من زيارة اهل وتجهيزات للعيد وما غيره

اشوفكم على خير ان شاء الله :)